پرەزيدەنت قاسىم-جومارت توقايەۆ ساپالى ءبىلىم بەرۋ ءۇشىن كوبەيىپ كەتكەن جوعارى وقۋ ورىندارىن بىرىكتىرۋ نەمەسە ولاردى تەكسەرۋ تۋرالى تاپسىرما بەرگەنى بەلگىلى.
وسى ۋاقىتقا دەيىن تەكسەرۋدەن وتكەن 5 وقۋ ورنى قىزمەتىن توقتاتقانى بەلگىلى. وعان ەندى تاعى ءبىر جوعارى وقۋ ورنى قوسىلۋى مۇمكىن. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ۇكىمەتتىڭ جيىنىندا ءمالىم ەتتى، دەپ جازادى Qamshy.kz اقپارات اگەنتتىگى. .
–ءبىز وسى ۋاقىتقا دەيىن رەسپۋبليكاداعى 5 جوعارى وقۋ ورنىنىڭ ليسەنزياسىن توقتاتتىق. ەندى تاعى ءبىر جوعارى وقۋ ورنىنىڭ ليسەنزياسىنان ايىرۋ تۋرالى سوتقا ءىس قاعازدارىن جولدادىق. اتالعان وقۋ ورنىندا زاڭ بۇرمالاۋشىلىقتار كوپ. ءبىلىم پروسەسى جەتكىلىكتى دارەجەدە وتكىزىلمەيدى. ستۋدەنتتەر ساباققا قاتىسپايدى. وقىتۋشىلار دا تولىق ەمەس. باسقا دا زاڭ بۇرمالاۋشىلىقتار بار. بۇل شىمكەنتتەگى وقۋ ورىندارىنىڭ ءبىرى،– دەدى ءبىلىم جانە عىلىم ءمينيسترى اسحات ايماعامبەتوۆ.
ءبىراق ول شىمكەنتتەگى قاي وقۋ ورنى؟ بۇل تۋرالى ءبىلىم ءمينيسترى اشىپ ايقان جوق. اسحات ايماعامبەتوۆ جوعارى وقۋ ورىندارى وزدىگىنەن جابىلعانى ءجون نەمەسە ولاردىڭ بىرىكتىرىلگەنى دۇرىس دەگەن پىكىردە. ايماعامبەتوۆ سونىمەن قاتار، كەيبىر وقۋ ورىندارىنىڭ كوللەدجگە اينالۋ مۇمكىندىگىن دە جوققا شىعارمادى.
پىكىر قالدىرۋ